Tista' tidħol, tirrisjedi u taħdem f'Malta għal perjodu ta' aktar minn tliet xhur bħala ħaddiem bi trasferiment intra-azjendali jekk int impjegat/a maniġerjali, speċjalista jew trainee. Id-definizzjonijiet u l-kundizzjonijiet ta' ammissjoni huma rregolati mil-Leġiżlazzjoni Sussidjarja 217.21. Jekk tipprovdi d-dokumenti kollha meħtieġa, imsemmija hawn taħt, tinħareġ permess ta' Intra-Corporate Transferee.

Jekk jogħġbok innota li qabel ma tiġi trasferit minn fergħa ta' kumpanija li tinsab barra mill-UE għal fergħa f'Malta trid tkun ġejt impjegat minn dik il-kumpanija għal ċertu perjodu ta' żmien: jekk int maniġer minn tal-inqas 3 sa 12-il xahar mingħajr interruzzjoni; speċjalista minn mill-inqas 3 sa 12-il xahar mingħajr interruzzjoni; trainee minn tal-inqas 3 sa 6 xhur mingħajr interruzzjoni.

L-applikazzjoni għal permess ta' trasferiment intra-azjendali għandha tiġi sottomessa lil Identità meta tkun residenti barra minn Malta.

Il-perjodu ta' validità tal-permess tal-ICT huwa ta' mill-inqas sena jew it-tul tat-trasferiment (skont liema jkun l-iqsar) u jista' jiġi estiż sa massimu ta' tliet snin għall-maniġers u l-ispeċjalisti u sena għall-impjegati trainees.

Identità tista' teħtieġ perjodu ta' mhux aktar minn sitt xhur li jgħaddi bejn it-tmiem tat-tul massimu ta' trasferiment u applikazzjoni oħra li tikkonċerna l-istess ċittadin ta' pajjiż terz għall-finijiet ta' dawn ir-regolamenti.

L-applikanti jistgħu jipproċedu bl-applikazzjoni tagħhom għal tiġdid tal-permess 90 jum qabel id-data tal-iskadenza tiegħu. Għandu jiġi enfasizzat li t-tiġdid tal-applikazzjonijiet jista' jiġi sottomess biss waqt li l-permess attwali tagħhom ikun għadu validu.