Il-minuri kollha mill-età ta’ 12-il sena sa 13-il sena huma meħtieġa jattendu personalment fl-uffiċċju tagħna peress li jkun hemm bżonn ta’ biometriċi tal-wiċċ diretti. Minn din l-età jiġu rreġistrati wkoll il-marki tas-swaba’ tal-applikant. Wieħed mill-ġenituri li jakkumpanja lill-minuri jrid jiġi personalment fl-uffiċċju tagħna jissottometti d-dokumentazzjoni t’hawn taħt.

• Formola A b'Sezzjonijiet 1, 2, 6 u 7 mimlija.
• Sezzjoni 6 fuq il-Formola A trid tiġi ffirmata miż-żewġ ġenituri u r-rakkomandatur. Ir-rakkomandatur irid ikun ċittadin Malti, tal-UE, jew tal-Commonwealth residenti f'Malta, li għandu grad universitarju, u li ilu jaf lill-applikant għal mill-inqas sentejn (2). Ir-rakkomandatur irid juża timbru tal-lastku bħala prova tal-professjoni tiegħu. Fin-nuqqas ta' timbru, irid jiġi pprovdut in-numru tal-warrant jew il-kwalifiki akkademiċi. Il-firem kollha fuq il-Formola ta' Applikazzjoni A jridu jkunu firem oriġinali bil-linka (wet signatures). Firem elettroniċi jew skanjati mhumiex aċċettati taħt l-ebda ċirkostanza, inklużi dawk tar-rakkomandatur. Iż-żewġ ġenituri jridu jkunu preżenti u jiffirmaw quddiem ir-rakkomandatur bl-użu ta' firem bil-linka.
• Sezzjoni 7 fuq il-Formola A mimlija, iffirmata u ttimbrata mill-istess rakkomandatur.
• 2 ritratti tal-passaport tal-minuri. Ir-ritratti għandhom ikunu stampati fuq karta tar-ritratti ta' kwalità tajba u b'riżoluzzjoni għolja. Il-minuri għandu jkun qed iħares 'il quddiem, b'għajnejh miftuħa u xufftejh magħluqa u mingħajr xedd ir-ras (wiċċ jidher ċar). Ir-ritratt għandu jittieħed fuq sfond abjad.
• Waħda mir-ritratti tal-passaport trid tiġi approvata mill-istess rakkomandatur, bl-użu tal-kliem Din hija immaġni vera ta' (isem u kunjom tal-minuri).
• Il-karti tal-identità jew il-passaporti validi u oriġinali taż-żewġ ġenituri.
• Kopja tal-karti tal-identità taż-żewġ ġenituri (quddiem u wara) jew il-paġna tad-data tal-passaport.
• Passaport preċedenti, jekk applikabbli.
• Jekk il-passaport jintilef u jkun għadu validu, għandu jiġi ppreżentat rapport oriġinali tal-pulizija.
• Il-minuri għandu jkun preżenti meta tiġi sottomessa l-applikazzjoni, akkumpanjat minn wieħed jew miż-żewġ ġenituri.

Informazzjoni addizzjonali

• F'ċirkostanzi normali, il-passaport ikun lest għall-ġbir wara 4 ijiem tax-xogħol bi ħlas ta' €40. Jekk l-applikazzjoni ma tkunx kompluta, l-applikant jiġi nnotifikat. Dan jista' jikkawża li l-proċess kollu jieħu aktar żmien. Jekk dokument wieħed jew aktar mill-oħrajn meħtieġa ma jiġux sottomessi, il-proċess tal-applikazzjoni jitwaqqaf immedjatament.
• Servizz urġenti huwa wkoll disponibbli bi ħlas ta' €80, fejn il-passaport ikun lest f'4 sigħat tax-xogħol.
• Tiġi applikata tariffa addizzjonali ta' €15 jekk il-passaport jiġi ddikjarat mitluf u jkun għadu validu.
• Wieħed mill-ġenituri jrid jiġi personalment biex jiġbor il-passaport, jippreżenta l-karta tal-identità/passaport oriġinali u validu tiegħu/tagħha.
• Il-minuri għandhom ikunu preżenti wkoll għall-ġbir tad-dokument peress li l-marki tas-swaba’ jeħtieġu konferma.
• Il-passaport huwa validu għal 5 snin.