L-Identità, b'konsultazzjoni mal-Uffiċjal Prinċipali tal-Immigrazzjoni, għandha tivverifika li ċ-ċittadin ta' pajjiż terz ma jippreżentax riskju ta' immigrazzjoni illegali u li jkun biħsiebu jitlaq mit-territorju ta' Malta mhux aktar tard mid-data tal-iskadenza tal-awtorizzazzjoni. Ċittadini ta' pajjiżi terzi li huma kkunsidrati li huma ta' theddida għall-ordni pubbliku, is-sigurtà pubblika jew is-saħħa pubblika ma għandhomx jiġu ammessi.

Applikazzjoni minn ċittadin ta' pajjiż terz għall-fini ta' xogħol staġonali għandha titqies inammissibbli jew miċħuda abbażi ta' kunsiderazzjonijiet tas-suq tax-xogħol.

Il-perjodu massimu ta' soġġorn għall-ħaddiema staġonali ma għandux ikun aktar minn disa' xhur fi kwalunkwe perjodu ta' tnax-il xahar. Wara l-iskadenza ta' dan il-perjodu, iċ-ċittadin ta' pajjiż terz għandu jitlaq mit-territorju ta' Malta, sakemm ma jkun inħareġ l-ebda permess ta' residenza skont il-liġi nazzjonali għal finijiet oħra għajr xogħol staġonali.

Jekk tixtieq tapplika għal ammissjoni għal impjieg bħala ħaddiem staġonali għal soġġorni li ma jaqbżux id-disgħin jum, trid tapplika għal liċenzja tal-impjieg ma' Jobsplus. Jekk teħtieġ informazzjoni dwar il-proċess tal-kisba ta' liċenzja tal-impjieg bħala ħaddiem staġonali inti ġentilment mitlub tikkuntattja lill-Employment License Unit Jobsplus (gov.mt).