Skont l-Att dwar il-Karti tal-Identità u Dokumenti Oħra tal-Identità, Kap. 258 tal-Liġijiet ta' Malta, kull resident f'Malta huwa obbligat li jipprovdi l-post ewlieni ta' residenza lill-awtorità pertinenti, li l-indirizz tiegħu jidher fuq id-dokument tal-identità jew tar-residenza. L-indirizz tal-post ewlieni ta' residenza jista' jintuża biss jekk l-individwu jkollu titolu validu għall-proprjetà permezz ta' sjieda jew jekk ikun daħal fi ftehim ta' kera uffiċjali u reġistrat mas-sid ta' tali proprjetà jew bil-kunsens tas-sid leġittimu tal-post residenzjali.

Skont l-Att dwar il-Kiri Residenzjali Privat, Kap. 604 tal-Liġijiet ta' Malta, il-kuntratti kollha ta' kiri residenzjali privat li jidħlu fis-seħħ wara d-dħul fis-seħħ tal-Att, inklużi t-tiġdid, iridu jiġu reġistrati mal-Awtorità tad-Djar. Huwa l-obbligu tal-kerrej li jissottometti tali reġistrazzjoni, inkluża d-dokumentazzjoni uffiċjali meħtieġa, fi żmien għaxart (10) ijiem mill-bidu ta' tali kiri. Ir-reġistrazzjoni għandha ssir permezz ta': https://portal.rentregistration.mt/.

F'sitwazzjonijiet fejn l-indirizz indikat fuq id-dokument tal-identità jew tar-residenza jappartjeni għal proprjetà li hija mikrija, lokata, jew ipprovduta għal użu temporanju mingħajr ħlas, is-sid jew il-proprjetarju ta' dik il-proprjetà ma jkunx jista' jiddisponi jew juża l-proprjetà sakemm l-indirizz ma jiġix dereġistrat u ma jibqax okkupat.

Ħafna mill-każijiet ta' reġistrazzjoni ta' indirizz mhux korrett iseħħu jew minħabba li l-utent naqas milli jwettaq bidla fl-indirizz jew dereġistrazzjoni tal-indirizz ma' Identità fejn applikabbli, jew minħabba li l-indirizz qed jintuża b'mod frawdolenti mingħajr awtorizzazzjoni legali.

Huwa importanti li wieħed jinnota li meta tinbidel l-indirizz ma' Identità, din l-informazzjoni ma tiġix trasferita awtomatikament lil entitajiet oħra, bħal kumpaniji tal-utilitajiet, Transport Malta, fornituri tas-servizzi tal-komunikazzjoni, sptarijiet u kliniċi nazzjonali jew privati, fost l-oħrajn. L-individwu li pprovda indirizz ta' kuntatt lil kwalunkwe organizzazzjoni, kemm governattiva kif ukoll privata, huwa responsabbli li jinfurmahom bi kwalunkwe bidla fl-indirizz. Individwi li jużaw indirizzi li għalihom m'għandhom l-ebda dritt legali, permezz ta' sjieda jew kiri reġistrat, jistgħu jkunu qed jiksru l-liġijiet nazzjonali.

Sidien ta' proprjetà li jkunu krew/qagħdu l-proprjetà residenzjali tagħhom lil parti terza, kemm jekk huwa ċittadin Malti, ċittadin tal-UE jew ċittadin mhux tal-UE (ċittadin ta' pajjiż terz), li jew temm il-kirja bi ftehim reċiproku, jew ħalla l-post u m'għadux jgħix hemm, huma obbligati, skont id-dispożizzjonijiet tal-Att dwar il-Kiri Residenzjali Privat (Kap 604), li jissottomettu tmiem tal-ftehim online lill-Awtorità tad-Djar, permezz ta' https://portal.rentregistration.mt/.

F'każijiet fejn sid ta' proprjetà jew jibda jirċievi posta ta' individwi li m'għadhomx jgħixu hemm jew li mhumiex magħrufa mis-sid u qatt ma kienu awtorizzati jgħixu fil-post, għandu jiżgura li l-indirizz jiġi meħlus mill-individwu mhux awtorizzat billi jimla kif suppost Formola ta' De-Reġistrazzjoni ta' Indirizz (link hawn ladarba tinħoloq paġna għall-formola), jipprovdi d-dettalji ta' kull sezzjoni tal-formola kif ukoll id-dokumentazzjoni li takkumpanjaha elenkata fit-Taqsima 5 tal-istess formola, kif applikabbli.

Fejn il-persuna li qed tuża l-indirizz mingħajr awtorizzazzjoni hija ċittadin Malti, is-sid għandu jmur personalment fl-Unità tal-Karti tal-Identità, Gattard House, Blata l-Bajda, sabiex jissottometti din il-formola u d-dokumentazzjoni kollha meħtieġa.

Fejn il-persuna li qed tuża l-indirizz mingħajr awtorizzazzjoni hija ċittadin mhux Malti, is-sid għandu jissottometti d-dokumenti lill-Unità ta' Konformità f'Identità, Triq il-Wied, l-Imsida. Qabel ma jissottometti d-dokumenti oriġinali l-Imsida, is-sid huwa mħeġġeġ jibgħat email lil landlords.identita@gov.mt billi jwaħħal il-formola mimlija kif suppost u d-dokumenti anċillari.

Il-proċess ta' reġistrazzjoni ta' indirizz għall-ħruġ ta' karta tal-identità jew dokument ta' residenza ma' Identità' jeħtieġ is-sottomissjoni ta' prova ta' sjieda. Għal dokumenti ta' residenza maħruġa lil ċittadini ta' pajjiżi terzi, dan il-proċess jobbliga l-provvista ta' ftehim ta' kera ffirmat, formola mimlija u ffirmata (b'firma bl-idejn) mis-sid li tawtorizza l-użu tal-proprjetà tiegħu min-nazzjonali mhux tal-UE, u l-ittra ta' approvazzjoni tar-reġistrazzjoni tal-Ftehim tal-Kera maħruġa mill-Awtorità tad-Djar. Mill-1 ta' Settembru 2024, Identità mhux se tkun qed taċċetta ebda ftehim ta' kera privat sakemm ma jkunux legalizzati permezz ta' nutar, avukat jew prokuratur legali, permezz tal-Formola ta' Verifika tal-Ftehim tal-Kera.

Barra minn hekk, Identità ma tirrilaxxax dokumenti ta’ residenza lil ħadd ħlief lill-applikant. L-applikant irid jipprovdi l-ittra tal-ġbir riċevuta bil-posta fl-indirizz reġistrat, idaħħal il-PIN li jinsab fuq l-ittra tal-ġbir, u jipprovdi prova bijometrika li taqbel mad-dejta bijometrika li nġabret qabel mill-istess individwu.

Fejn Identità tiġi infurmata mis-sidien tal-proprjetà jew b'mezzi oħra, li ċittadin ta' pajjiż terz m'għadux jirrisjedi fl-indirizz reġistrat ma' Identità, jinbeda proċess ta' verifika, li jinkludi tfakkira u talba uffiċjali liċ-ċittadin ta' pajjiż terz (u lil min iħaddmu, fejn applikabbli) biex iwettaq bidla fl-indirizz fi żmien stabbilit. Sakemm il-bidla fl-indirizz ma ssirx fi żmien stabbilit, il-permess ta' residenza jiġi effettivament irtirat, bl-awtoritajiet rilevanti bħall-Pulizija u Jobsplus jiġu wkoll notifikati bħala kwistjoni ta' proċess.

Fil-każ ta' ilmenti, kwalunkwe data jew dokumentazzjoni pprovduta mill-ilmentatur lil Identità tiġi trattata bl-akbar kunfidenzjalità u ma tiġix kondiviża ma' ebda parti terza. Id-data tista' tiġi kondiviża biss ma' awtoritajiet governattivi oħra għal skopijiet ta' verifika u investigazzjoni, jekk meħtieġ u awtorizzat bil-liġi. L-ilmentatur jirċievi aġġornament dwar il-kwistjoni mingħajr il-kxif ta' kwalunkwe data personali minħabba li l-kxif ta' data personali huwa pprojbit taħt ir-Regolamenti Ġenerali dwar il-Protezzjoni tad-Data. Din l-informazzjoni tista' tiġi mgħoddija lill-Pulizija jew kwalunkwe awtorità rilevanti oħra kif meħtieġ, għal kwalunkwe azzjoni li tista' tkun meħtieġa.

Il-proċess ta' dereġistrazzjoni deskritt f'dawn il-FAQs jista' jiġi segwit. Għal aktar informazzjoni, jekk jogħġbok ibgħat e-mail lil landlords.identita@gov.mt.

Ċittadini ta' Pajjiżi Terzi u min iħaddimhom jistgħu jsibu informazzjoni dwar il-proċess kollu tal-permess ta' residenza fuq il-websajt ta' Identità, primarjament fit-taqsimiet tal-Espatrijati u l-Unità Ċentrali tal-Viżi. Aktar informazzjoni pertinenti speċifikament għall-permessi ta' impjieg tista' tinstab fuq il-portal tal-applikazzjoni online - https://singlepermit.gov.mt/

Identità toħroġ ukoll ktejjeb ta' informazzjoni ma' kull dokument ta' residenza maħruġ. Dan id-dokument jista' jinstab ukoll online https://identita.gov.mt/wp-content/uploads/2024/03/Rights-and-Obligations.pdf.

Informazzjoni dwar il-proċess tal-bidla fl-indirizz għat-TCNs tista' tinstab permezz ta' din il-link: https://identita.gov.mt/expatriates-unit-noneu-nationals-change-of-address/