Stqarrija għall-Istampa minn Identità, il-Kunsill Notarili, il-Kamra tal-Avukati, u l-Prokuraturi Legali

It-Tlieta, 17 ta' Settembru 2024

FTEHIM INTLAĦAQ MA' DIVERSI PARTIJIET INTERESSATI DWAR L-ATTESTAZZJONI TA' KUNTRATTI TA' KIRI

Konsultazzjoni wiesgħa twassal għal ftehim dwar il-mili tal-formola

Wara sensiela ta' konsultazzjonijiet, intlaħaq ftehim dwar il-Formola ta' Attestazzjoni tal-Ftehim ta' Kiri ta' Proprjetà bejn Identità, il-Kunsill Notarili ta' Malta, il-Kamra tal-Avukati, u l-Prokuraturi Legali.

Dan il-ftehim intlaħaq wara diskussjonijiet dwar kif il-ftehimiet ta' kera ta' proprjetà, ippreżentati bħala parti minn applikazzjoni għal permess ta' residenza, għandhom jiġu attestati uffiċjalment minn Nutar, Avukat, jew Prokuratur Legali. L-iskop ta' din il-verifika huwa li tiġi żgurata l-eżattezza u l-affidabbiltà tal-informazzjoni pprovduta lill-Aġenzija u ċertezza legali sabiex jiġi evitat l-abbuż.

Kull ftehim ġdid ta' kera se jiġi attestat mill-professjonisti msemmija hawn fuq, bl-għan li jissaħħaħ aktar il-proċess kemm għal Identità kif ukoll għall-kerrejja u s-sidien. Dan se jippromwovi responsabbiltà akbar kemm mis-sidien tal-proprjetà kif ukoll mill-kerrejja u jiżgura l-aderenza mal-liġi filwaqt li jipprevjeni dikjarazzjonijiet foloz. Din il-formola se ssir obbligatorja mit-Tnejn, 23 ta' Settembru 2024 għall-applikazzjonijiet li jinvolvu kuntratti ġodda ta' kera, u tagħti lill-partijiet involuti żmien suffiċjenti biex jikkonformaw mar-rekwiżiti.

Identità se tkompli żżomm politika ta' tolleranza żero fuq l-abbużi, u kwalunkwe każ ta' abbuż jiġi rrappurtat lill-awtoritajiet rilevanti. Identity Malta tibqa' impenjata li tissalvagwardja l-interessi kemm tal-kerrejja kif ukoll tas-sidien tal-proprjetà, filwaqt li tkompli ttejjeb il-proċessi tagħha biex tnaqqas l-abbuż, tippromwovi t-trasparenza, u tiżgura governanza tajba.