Ir-Reġistratur taż-Żwiġijiet għandu jiġi nnotifikat b'dan li ġej:

1. Il-knisja fejn se jsir iż-żwieġ;
2. Id-data taż-żwieġ;
3. L-isem u l-kunjom tal-qassis li se jiċċelebra ċ-ċerimonja taż-żwieġ;
4. Il-kunjom/ijiet tal-konjuġi wara ż-żwieġ u l-isem tal-familja li qed jiġi adottat.

Il-koppja għandha tipprovdi wkoll:

1. Ċertifikati tat-twelid (jekk it-twelid tal-applikanti ma jkunx irreġistrat mar-Reġistru Pubbliku ta' Malta) apostillati jew legalizzati kif meħtieġ (sakemm ma jkunux ġejjin mill-Unjoni Ewropea);
2. Dokumenti tal-identifikazzjoni u kopji tagħhom;
3. Fotokopja tad-dokumenti tal-identifikazzjoni tax-xhieda;
4. Dokumenti oħra kif meħtieġ.

Ir-Reġistru Pubbliku jeħtieġ dokumenti oriġinali għall-finijiet ta' reġistrazzjoni. Dokumenti ppreżentati lir-Reġistru Pubbliku jinżammu b'mod indefinit fl-arkivji tiegħu. Dokumenti pubbliċi li mhumiex bil-lingwa Ingliża jridu jiġu tradotti bil-Malti jew bl-Ingliż. F'każijiet fejn qasam wieħed jew diversi oqsma huma f'lingwa oħra għajr il-lingwa Ingliża jew Maltija, hija meħtieġa traduzzjoni ta' dawn l-oqsma għall-ipproċessar tad-dokument. Aktar informazzjoni tista' tinkiseb mill-LINK li ġej.

Għaxart (10) ijiem qabel iż-żwieġ tagħhom, il-koppja trid tiġbor żewġ (2) kopji tal-Att taż-Żwieġ u ċ-Ċertifikat tal-Banni. Dawn għandhom jiġu ppreżentati lill-Kappillan tal-parroċċa fejn se ssir iċ-ċerimonja tat-tieġ.

Wara ċ-ċelebrazzjoni tal-quddiesa tat-tieġ, il-koppja, flimkien max-xhieda u l-uffiċjal tat-tieġ li jamministra l-kunsens, iridu jiffirmaw l-Att taż-Żwieġ. Dan iċ-ċertifikat irid jintbagħat lura lill-Uffiċċju tar-Reġistru Pubbliku mill-Kappillan għar-reġistrazzjoni.

Ċittadini Maltin li qed jippjanaw li jiżżewġu ma' barrani jew persuna li għexet barra minn Malta għal perjodu ta' żmien se jintalbu jippreżentaw dokumentazzjoni addizzjonali b'appoġġ għall-applikazzjoni tagħhom.

Dawk il-koppji li se jiżżewġu Għawdex għandhom japplikaw għall-bandi taż-żwieġ tagħhom fir-Reġistru taż-Żwiġijiet fil-Belt Victoria, Għawdex.